زياره الى منازلنا القديمه ..من خربااات سدير...

[ذيب سدير]

[align=center]السلام عليكم ورحمة الله وبركاته

اليوم ابي اخذكم معي لاحد البيوت القديمه في روضة سدير ..وابي امشيكم فيه ..



هذي صورة بيت قديم في روضة سدير لازال قائماا وفي حاله جيده ....
والبيت هذا بيت الماضي..وهو من اجمل البيوت في الروضه ....
طبعاا الفلاليح دائماا مايكون عندهم بيتين.. بيت في المزرعه مثل بيت القديم الي في الصوره .. وبيت في الديره ...اما بيت المزرعه فهم اكثر ما يسكنونه في الصيف ..لان المزارعين يكونون مرابطين للمحاصيل مثل .. العيش والزرع والنخل والعنب والخضره..الخ..والشتاء يرجعون لبيت الديره ..لقلة المحاصيل الشتويه ...


اماا الصورتين هذول ..فهي صورة المصابيح والمنور ...وانتم خابرين الاولين لا انوار ولا شي .. والمصباح او المنور يجلسون فيه ..ويغسلون مواعينهم ..والخلاقين ..الخ.. لان فيه نور ..والغرف الباقيه خرمس مايشوفون شي..




اماا هذي فهي صورة باب الدرجه والدرجه ..الله من واحد تكرفس فيهاا هههه...شوفوو الفرق بين درج السراميك الموجود الان ودرج الحيفانه الي عندهم ..الله يجعلهم في الجنه ..

والصوره الي تحتهاا لباب الصفه..والصفه هي غرفه تكون تحت ودائماا تكون للبهائم والعيش والحطب ..الخ ..ونشوف داخل الصفه الجصه ..
الجصه هي حجيره صغيره لهاا بويب يحطون فيهاا التمر ..وتحتهاا المدبسه ..لستخراج الدبس ..



اماا الصوره هذي فهي صورة قروو الاولين وهو من الاشياء الضروريه عند الاولين ..
اماا الصوره الي تحتهاا فهو جزء من المطبخ..ونشوف فيه التنور للخبز وغيره ..بساطه ..



وهذي صورة الغماء(السقف) حق البيت .. وهو من جريد النخل والاثل..وطامينه بترااب ...عازل طبيعي ..

والصوره الي تحتهاا صورة باب الشارع ... الباب كبير عشان تدخل البقره والبعارين .. يعني يحسبون حساب كل شي ..




اماا الصوره الاخيره فهي صورة التسينيف او المسترااح وهو (الحمام)..وقليل ما يصير له بااب .. دائما يصير في السطح او في الدور الثاني ويكون بابه في بعض الاحياان قماش على خيط ..
الله يغفر لهم ويرحمهم ..

وشكرااا[/align]

[مثل النخيل خلقت]

اخوي محمد ..

سلمت لنا عدستك اخي الكريم ..

رحم الله اجدادنا وجدتنا وكل من سكن تلك البيوت ..


الف شكر لك اخي الغالي ..

[بنت الشيوخ]

ماشاء الله....

روووعه البيووت والشغل..
احس اني اشم ريحة الطين..

ماشاء الله عليك..

صدق انك ذيب..الله لايضرك..

بس ماتخاف يطلع لك جني والا شي عقب خرفرف هع

تسلم ايدينك كموني..

فمان الله
وبس خلاص

[الأسطوره]

حفضك الله أخي على المجهود

[رذاذ جــوري]

والله شكلها زينه


يوم اروح اشوفها شكلها طايحه

ولا فن التصوير





تسلم يدينك خيو

[عبدالله الفـارس]

..

الله يرحم من سكنها ويجعل مساكنهم الجنة ياارب

صور جميلة ورائعة

شكرآ محمد السويح

..

[زهرة]

صور جميلة

وآثار قيمة تربط الحاضر بالماضي


لك الشكر أخي الكريم ذيب سدير

[ام سديـم]

الســلام عليكم

الله المستعــان

زيارة روعة يا ذيب سدير

تسلم

[منيف المنيف]

اشبه بالتحقيق الصحفي عن البيوت الطينيه اخوي محمد شاكر ومقدر لك مجهودك الواضح في ابراز معالم روضة سدير قديماً وخاصة في فن العمارة الطينيه

[يـــزيـــد]

السلام عليكم

ماشاء الله اخوي محمد صور رائعة وتذكرنا بالماضي

وبصراحة التجول فيها متعة لا مثيل لها ،، بحكم انه يستحال العيش فيها الآن

[ذيب سدير]

شكرااا لكم جميعااا على المشااركه والله يعطيكم الف الف عافيه ....


بنت الشيوخ..
اناا اخاف على البيت لا يطيح مني ما اخاف يطيح علي ..
<<الله من الصدق ..

[القاصف]

[align=center]محمّد .. ما تخلّيني أعيش بهـ ( الخرابة ) كم يوم ؟! ودّي أمسح على الطين وأبوسه !

آآآآه .. الطين بارد .. أبرَد مِن البيوت الحاليّة .. المبنيّة مِن الحجَر والمحشيّة بالحديد المسلّح !



الله يجازي الحضــارة .. اللي خلّت أهلنا الأوّلين يطلعون مِن بيـوت الطـين الحـلوَه !

قبل ما أنهي كلامي .. ودّي أسأل عن معاني بعض الأشياء والكلمات :


1- القـرُو هو الجليب ( البير ) .. صـحيح ؟؟


2- يوم بيّنت المسـتراح .. شتقصد بالـ ( حمـام ) .. الحمّام يعني ؟؟

3- بعدين .. وين التنـور .. ما أشـوفه !



كل الشكـر أستاذي

( ذيـب سـدير )

على هذهِ الصُـوَر التي أعشـق منظـرها

وأنتظـر رَدّك[/align]

[عبدالعزيز]

ماشاء الله

تقرير في قمة الروعه

الف شكر يابعدي

[ذيب سدير]

اخوي القاصف ..

المشاركة الأصلية كتبت بواسطة   1- القـرُو هو الجليب ( البير ) .. صـحيح ؟؟ 2- يوم بيّنت المسـتراح .. شتقصد بالـ ( حمـام ) .. الحمّام يعني ؟؟ 3- بعدين .. وين التنـور .. ما أشـوفه

القروو...هو حجر منحوت على شكل دائره او مربع او مستطيل يوضع فيه الماء ....

المستراح هو اسم (الحمام ) وهي دورة المياه ...وهي كلمه شائعه في الخليج ككل ليس عندناا فقط ..

التنور هو ذالك الشكل الدائري الذي قي وسطه سواد ..والاولين يخبزرو فيه ويستخدمونه في بع الاوقاات لناار ...
وشكراااعلى مرورك ...والله يعطيك الف الف عافيه ..


اخوي شيخ شمر ..كراا على مرورك والله يعطيك الف الف عافيه ..

[القاصف]

[align=center]ايـــه .. تقصـد الصـورة الثانيَة .. اللي تحت :


امممم .. أنا اعتقـدت إنها في صـورة أخرة

شكـراً أسـتاذي على التوضـيح

بارَك الله فيـك[/align]