السلام عليكم ورحمة الله وبركاته ,,,,
ــــــــــــــــــــــــــــــــــــــــــــــ ـــــــــــــــــــــــــــــــــــــــــــ ــــــــــــــــــــــــــــــــــــ
فالبدايه اذكر اللي عالمٍ كل الخفايا = ربنّا اللي نطلبه لا شانت الدنيا علينا
فـ يالله اني في عطاك آمنت يا جزل العطايا = واقتنعت ابمدّتك يا رب كل المسلمينا
من بعد ذكرك نويت اسوق للعليا مطايا = شرق ولاّ غرب ولاّ من يسار ومن يمينا
شاقني فعل الزحول وهاضني طيب السوايا = والرجال اللي يديهم جا العوض فيها يدينا
ورّثونا المجد ودروبٍ تصد اعن الخطايا = وافتخرنا في فعول اهل الفعايل كلبينا
يا سِعِدْ عيني ليا مرّت على المجلس حكايا = واذكرو فيها رموزٍ للرجال الاولينا
ارتفع راسي وعيني ما تطالع للدنايا = ونعّمو لي من يعدّون الصحيح الطيّبينا
لابتي يا لابتي يا عز ترفات الصبايا = يا مطوّعة الصعب بالسيف والقاسي يلينا
ويا مذلّلت اللعين اللي نقل شين النوايا = ويا معززّت الندير اللي جمع دنيا ودينا
ويا مبنّيتن بيوت العز في كل القرايا = ويا مهدّمتن بيوت الذل والحصن الحصينا
يا سهولٍ فالسهاله مكرمة بيض اللحايا = يا سهولٍ فالصعب تاطا على الشين ويزينا
فعلنا بيّن من الدمام لا سبت العلايا = ومن جنوبيّ الحسا يمشي يا لين اطراف لينا
لا اعتزينا قامت الدنيا وبيّدنا سرايا = نكسب الطالات فالافعال لامنّا اعتزينا
دون ماقفنا نسوق الروح لحياض المنايا = نحدي العيّال لدروب الشقا ما يحتدينا
الدخيل انعزّ شانه كلنا دونه ذرايا = والقصير يصير قدّام العرب منّا وفينا
ما علينا لو وطينا دونهم حمر اللظايا = ولو فقدنا لجلهم شيخ القبيله ما علينا
وان نواهم طايشٍ فالشر جينا له حمايا = ناسمه فالميسم المشتب بين الحاجبينا
وان لفانا الضيف لو انّا من الدنيا عرايا = واجبه حاضر ولو يلحق هل الماجوب دينا
ويش اعد وويش اخلّي كل مافينا مزايا = بس هذي نبذةٍ تهدى لـ اذان السامعينا
ظافر بن سعود السهلي
03-09-2009, 04:31 AM
العرض العادي
