سلام عليكم
كيفكم حبايبي
طيبين ان شاء الله
طيب انا وش دخلني طيبين ولا لا ---- داري بايخ ----
المهم ما اطول عليكم
انزلوا تحت واقروا واللي يعجبه يمدح واللي ما يعجبه يقلب وشوه
مسوي لبناني -- يا شين السرج على البقر ----
واللي نص ونص -------> اقول كمل لاركبك على كفر
المهم
اي مره من المرات بغيت امزح مع اهلي ====> الله من الدباشه
حبيت اشوف هم يحبوني ولا لا
قلت باختفي واشوف هم بيدوروني ولا لا ----- ابد خذ راحنك من زينك --
اقولكم من ذا اللي كل شوي مقاطعني --- داري دمي ثقيل -----
رحت ذاك اليوم الصبح للمدرسة ولا رجعت رحت اتجول في مدينتي الحبيبة --- مسوي وطنية ----- وانا اتمشى وكان معي وقتها هايلكس 82 غمارة بدون مكيف ولا مروحه
درت ودرت وقلت في نفسي انا ما قد رحت للحلة اللي صاجينا بها
؟؟
قلت يا ولد دز الحلة
واروح لها وادخل حواري ضيقه
يالله يطيع الموتر يدخل معها
وما القى قدامي اللى اثنين بعارين
_ مظللين تكتيمه _ يعني بالعربي تكارنه
قلت في نفسي الشرطة غيرو سيارتهم حطو بعارين بدل اللومينات
اوفر للبنزين ولا وش القصة
انا حسبته تفتيش
ووقفوني وقالوا حول
قلت لهم ارسل مسوي استخف دمي عليهم وما دريت اللي ويطلع شيء
ابيض من وسط وجهه قلت في نفسي وش ذا
اثره الحيوان يبتسم وهذي ظروسه
قالي تستهبل انت
قلت
لكل براءة
لا والله
بس امر يا الشيخ --- صارشيخ الحين من الخوف والله --
قال انزل من السيارة
نزلت انا من السيارة
قام وحط وجهي على الغمارة ولصق برطمي عليها والله لا يوريكم حررر
لصقت انا قام يفتش ثوبي وما لقى الا مفتاح سبير للموتر --- الله واكبر يالفياقرا الحين -- -
ولقو بعد ساعة شاريها للشغاله -
موصيتني عليها امي ونسيت اعطيها اياها
وقالي معك فلوس
قلت له كم وكلمة كم هذي ما طلعت الا بعد عناء لان برطمي استوى مع الحرارة
وانا على نياتي اقوله كم --- يقالك مطخ طخ
قال انا مانبي سلف
انا نسأل معك فلوس قلت له لا
وكان بطني يمحطني
مفطر سندويشة مخ بالجبن من عصارة الشميسي ومعها عصير شمام بالحليب الله من زين الذوق
قام يمحطني بطني زود من الخوف اللين صار وجهي الوسيم كنه
شاورما تسالي سخيف من تحت وعريض من فوق قمت يالله اكلمه
قلت له توصي شيء يا الحبيب قال لي وين بدري
ويلتفت على خويه وقاله الرجال طيب وحبوب يبي يمشي
قلت له ابد قريب قام واحد منهم وشقلني على كتفه وضغط على بطني
الين قمت اصبصب عرق من حلة البطن
قلت له بالله اقرب مسجد
قالي تستهبل ما بعد اذن --- لا فيه خير يعرف الوقت --
المهم وانا اللي اتطلبه تكفى حولني حسران
قال طيب وش تبيني اسوي لك اروح بك للحمام
قلت ايه تكفى
-- هو انا قلتها ولا ما قلتها ناظرني كذا وكتم ونزلني
وقال ش تقول قلت بطنييييي لطني خلاص انا معد اقدر اتكلم
وما درت الا احس بخدي يوهج حرارة عالية جدا
بسبب تاثير الكف اللي ارسلته لي يده
وانا كملت بطني خلاص الفرامل معد تمسك
وكف يعني ( ميتم )
--- قعدت اتذكر واقول الله لا يعيد اليوم اللي بغيت اعرف فيه غلاتي عند اهلي
---
والله واجيب العيد عنده ( عاد انتم افهموها ) لو شرحت مشكلة --
قام وشاتني شوته احس ان ثوبي صار وسيع علي منها
وقال الله يخسك يا القذر ---- من نظفه هو عاد ---- وتركني وانا اللي اروح لدورة المياه واظبط اموري واعود والقى الموتر موب فيه
قلت حبيبي كملت
والله واسحب رجلي واخذ لموزين واعود للبيت على الساعة 2.00 الظهر
يعني قد طلعو من المدارس قلت مار خلني استفيد ابشوف هو اهلي ضاقت صدورهم علي ولا لا ---- الحمار مصر الا الحين - الله من الدلاخة -
وانا عند الباب يوافيني ابوي وقال وين الموتر يا حيوان
قلت لا فقدوني قلت في مغسلة السيارات
قال ايه اشوى
وقال كنك مبكر شوي
عسا منتب طالع من المدرسة قلت لا لا الساعة الحين ثنتين طالعين لنا نص ساعة
وادخل البيت والقى اموي تكلم بالتلفون قلت -- امي حنونة اكيد بتتباطاني وتقول وين كنت فيه
واحتريها تخلص من التلفون الين الساعة خمس العصر
ويوم خلصت قالت لي قم ودني لابو ريالين
قلت امحق فاقديني
واروح لابوي وقلت له عطني سيارتك --- يمون الرجال --
قال ما بعد جبتا الموتر من المغسلة
قلت له بكل جرأه ووقاحة الموتر انسرق
وما مداني انطق حرف القاف حق كلمة انسرق الا والدكتور يقول لازم خياطه ثمان رتب
ابوي صكني ببيالة شاهي معه
واطلع من المستشفى
وارجع لين ابوي يحترين بباقة ورد ( امحق عسيب نخلة )
وقال انا داري اني اوجعتك ( كل ذا وبس اوجعتك خياطه ثمان رتب )
لكن انت نرفزتني والسيارة مو مشكلة
لكن هذا وجهي ان شديتامفتاح مره ثانيه
واروح للحلة مره ثانيه بلموزين قلت ابهاجر
والقى اخوياي الثنين في نفس الحارة
ومسكوني وعفجوني لين دخت قلت وش السالفة
قالوا ورا الموتر ما فيه حبال ولا بنزين
قواية وجه
وانا اكتب لكم هذي القصة على جهاز ولد خالتي المحمول
في مستشفى الشميسي
معاني الكلمات :
عفجوني : العفج من الضرب يعني ضربوني
الحلة / حي من ارقى احياء الرياض
شديتا: يعني مسكتا
عسيب نخلة : يعني غصن من غصون النخلة ( ياي )
صكني : اعطاني لكن بتحمس
ابو ريالين : احدى المراكز التجاري المنتشرة في جنوب وغرب الرياض لبيع كل غرض بريالين فقط
بتتباطاني : يعني بتقول وراه تاخر
تحياتي / غويمض
26-06-2003, 09:46 PM
العرض العادي
