قصه رهيبه جتني على البريد

[غويمض]

قبل كل شي افصل الاتصال علشانها طويله

فتى الشميسي


الساعة الحين حول 5 العصر ،،، وخوينا بطل قصتنا جالس ببيتهم وفي يده ريموت الدش وفي الثانيه ملعقه جالس ياكل بها بليله شاريها من التسالي اللي عند بيتهم ،، شوي الا ويرن تليفونهم ويرد عليه (( أجل مهوب راد ؟ )) ويسمع صوت عجوز تقول : الو ،، محمد انت فاضي الحين وانا امك ؟؟
وبما أن خوينا هذا قليل أدب ويحب اللكاعه فقد رد على العجوز وقال : أيه يمّه فاضي ،، وش تبين ؟؟
قالت العجوز : أجل شف وانا امك ابيك تجيب التجوري لبيتنا الحين ،، لأنك عارف ان كلنا بنسافر ولازم التجوري يكون بمكان أمين علشان اللي فيه ،،، وبيتنا بيكون أكثر أمن من بيتكم ،،، فجبه ولا تصيف .
رد خوينا وقال : ماعندي تجوريات ومنيب محمد بس استهبل والا انتي غلطانه (( يا ثقل دمّه ))
لاغته العجوز شوي ومحطت بالسماعه في وجهه بعد ما دعت عليه 30 دعوه ومن ضمنها قالت له (( جعلك تطيح من السطح )) مع ان خوينا ساكن في شقه بالدور الأرضي
المهم خوينا سكّر السماعه ورجع لبليلته ،،، يوم توه يأكل البليله مستمتعاً خطرت في باله فكره شيطانيه ‘‘
قال في نفسه (( الحين هالعجوز الغلطانه تبي ولدها يجيب التجوري في بيتهم علشان هم بيسافرون ولا يبونه ينسرق ،،، ليه ما يكون اللي بالتجوري من نصيبي وخاصة ان الطريق ممهد والناس بتسافر )) ؟؟ وضحك ضحكه عاليه اهتزت لها اركان عشة حمام جيرانهم ،، ثم نطل البليله جانباً واستعد لتنفيذ خطته اللعينه .
وفي صباح بكره اتصل على واحد من اخوياه يشتغل بالهاتف وعطاه رقم العجوز وقال له (( أبيك تطلع لي اسم راعي هالتليفون ووين بيتهم فيه لأننا نطلبهم فلوس من زمان ولا سددوها ،،، وآخر شي يتصل واحد من عيالهم ويقول لي اقلب وجهك ما عندنا لكم شي ويسكر بوجهي وانا ابي اعرف بيتهم علشان اتوطى ببطنه )) .
طبعاً خوي الرجال من جنبها ويصدق كل شي ،،، واعد خوينا انه اذا طلع من الدوام بيكون معه برنت كامل لوصف بيتهم وبيت جيرانهم ووش اسم خدامتهم بعد
جلس خوينا واللي كان اسمه (( طلعت )) <<< ما كنه اسم مدرس رياضيات ؟؟
المهم جلس الرجال انت يا طلعت يفكر في خطه لسرقة تجوري العجوز طبعاً بعد ما يجيب له الرجال كل المعلومات الخاصه عن البيت واهله .
وفي الليل مره خويه وجاب معه اللي قاله وتقهوا عنده وطلع بعد ما شكره طلعت ،، وفي الليل نام طلعت قرير العين والأذن بعد لأنه حصل اللي يبيه وقرر من صباحية ربنا او من النجمه على قولة المصريين يبدا خطته
وأشرقت شمس يوم جديد (( أجل شمس يوم مستعمل ؟؟ )) وقام طلعت وغسل وجهه واكل له تفاحتين وشرب قهوة الصباح مسوي اوروبي ولبس بالطو الشغل ما اننا بالصيف و اتجه لأقرب كباين واتصل على الرقم حق العجوز يشيَك كانهم سافروا او لا ،،، رن التليفون ورد واحد من عيالهم وسكر بوجهه وعرف انهم ما سافروا .وكرر العمليه في اليوم الثاني والثالث والرابع واستمر اسبوع ،،، وفي اليوم الاسبوع دق مره ومرتين وثلاث محد رد عليه ،،،، بس قال في نفسه يمكنهم فصلوا التليفون من الازعاج .
ورجع لبيته ،،، وبعدها بثلاثه ايام رجع وكرر محاولته ونفس الشي محد رد ،،، وكذا ايقن ان مافيه احد وقال : اصلاً انا بروح اطق الباب واسوي نفسي غلطان ان فتحوا لي فهم فصلوا تليفونهم من الازعاج وان ما فتحوا فتراهم سافروا .
وفي ليلة كان القمر فيها محاقاً (( وش معنى محاق ؟؟ )) شغل طلعت الهايلوكس الغماره حقه واتجه صوب المنزل المقصود ،،،، طرق الباب عدة مرات ما فتح له احد ،، طالع البيت ولقاه مظلم يعني شكل ما به احد ،، شوي الا وولد جيرانهم الصغير طالع بيحاسب مطعم موصل لهم اكل (( اجل موصل لهم بطانيات ؟ )) وقال طلعت للولد : الحين يا شاطر جيرانكم وينهم ؟؟
قال الصغير : وش تبي فيهم ،، علمني بسرعه قبل يبرد الاكل ؟؟
فأيقن طلعت ان هالولد اشد منه قلة حيا
ثم استرسل قائلاً : انا يا شاطر خالهم وتوي واصل من الحوطستان كنت رايح اجيب لي غنم بحكم اني تاجر سيارات ،، والحين رجعت بسلم على اختي وعيالها بس مافتح لي احد .
قال البزر : عطني اثباتك اتأكد انك خالهم ،،،، والا تدري تراي امزح معك بس هم سافروا راحوا كلهم للشرقيه علشان جدهم ماعاد يمشي وودوه هناك عشان الدكتور قال يلزمه حمام بحري ورملي مع بعض لأنه لو قال الدكتور رملي بس كان ودوه للثمامه و لو .....
قال طلعت : انطم خلاص ،،، ود العشا لابوك لا يفقع وجهك وانا بروح ارقد بفندق البطحا وان شفتهم سلمني عليهم ،،، الا صدق ما تدري متى بيجون ؟
قال الولد : اسمع امهم تقول لامي بعد اسبوعين والحين راح 9 ايام يعني باقي 5 (( اجل وش ظنك )) ؟؟؟
المهم طلعت خذا اللي يبيه من معلومات وراح لبيته على اساس يبدا الشغل بكره (( من سمع يبدا الشغل قال مقاول )) .
وفي بكره ليلاً << صح الاسلوب ،،، راح طلعت في وقت متأخر للحاره حقت العجوز ،، وتأكد ان ما في الشارع أحد ولا سيارات مطاعم ولا شي ،، ويوم انه حس بالأمان تعلق بعداد الكهرب فالجدار فقفز في البيت المظلم وسقط في الملحق كتساقط اوراق الخريف ،،، شيّك على كل شي بالملحق لقا كل شي مقفل حتى غرفة السواق من زينه وغرفته ،، والمجالس الخارجيه والداخليه والجوازات ،، المهم بقت مشكله الحين وشلون يدخل داخل البيت وهو مقفل ؟؟
رفع راس وناظر ميمنه وميسره (( يمين ويسار للي ثقافتهم ما حولك احد )) فلفت نظره فتحت مكيف مافيها مكيف ،، فتعلق فيها وأحبها ،، قصدي تعلق وطب جوا المخزن وطلع الكشاف من جيبه لأنه ما يبي يشغل النور وينفضح ،،،، دخل جوا البيت وقلب فيه يمين ويسار وطلع للدور الفوقي على طول ،،، وحصل كل الغرف مقفله ،،، رجع للدور التحتي ودخل للمطبخ قاصداً أخذ الساطوره علشان يكسر البيبان ،، وتوه داخل المطبخ الا ويشوف ثلاجه وصحون وكيسان كثيييييره وفي هذه اللحظه بالذات تمنى ان يأخذ النصر واحد من هالكيسان نظراً لكثرتها
المهم توه يدور الساطوره الا ويلقى مجموعة مفاتيح في واحد من دروج المطبخ وقال في نفسه : كويس وفرت علينا الازعاج بهالليل بس عسى تكون مفاتيح للغرف اللي فوق !!
أخذ المفاتيح ورجع للدور الفوقي وأخذ معه الساطوره احتياط .
وجرب المفاتيح وصارت مفاتيح البيت فعلاً ،، وجربها كلها على الغرف وفتش الغرف كلها ما لقى التجوري اللي قالت العجوز ،، يوم وصل لوحده من الغرف ويدور ولا يلقى شي ،،، وكان بهالغرفه صورة لمنظر طبيعي وهي صورة ضب ميت ،، وطلعت كان ذيب رفع الصوره كما في الافلام وحصل ما كان يبحث عنه
لقى طلعت التجوري ورا الصوره مثل ما توقع والظاهر ان المسلسلات والافلام كان لها تأثيرها على العجوز يوم تحط تجوريها هنا ،،، المهم طلعت شال التجوري ورجع الصوره لمحلها ،،، وتوه طالع بالتجوري ونازل به الا ويلمح بالصاله ساعة يد والظاهر انها جديده ،، صلحت الساحه لطلعت وقال (( زيادة السرقه سرقتين )) والله قليل ادب هالطلعت ،، خذا الساعه معه هي والتجوري ،، بس كان اخلاق شوي وهو طالع حصل لمبه والعه بالملحق وطفاها يقول لا تصرف عليهم كهرب .

خذا عدته وطلع وشغل سيارته واتجه لبيته وهو يلوم نفسه ويقول عسى ما يزعلون اني سرقتهم (( مسوي اخلاق )) .
وصل بيته وحط الاغراض في مكان امين والأغراض هي التجوري اما الساعه فتركها بالسياره لزوم الكشخه بكره قدام العيال
ويوم جا الصبح طلع طلعت التجوري وفتحه وحصل فيه ....



هذا الموضوع برعاية شركة ليبتون للبطانيات ومفاتيح الغاز


7
7
7
7
7
7
7
7
7
7
نعود اليكم بعد الاعلان ،، وبصراحه توقعوا بعد كل سطرين اعلان واهم شي المكاسب

المهم ان طلعت فتح التجوري وحصل فيه 700 ريال فقط يعني ما تسوى حق المخاطره (( مهوب عاقل سعد خضر )) ،، وبصراحه ضاق صدره وتحطم نفسياً ومعنوياً ،، وجالس يومين مضرب عن الطعام ما يدري ان محد درا عنه نيلسون مانديلا
وبعد اليومين استعاد تفكيره ،، واول شي سواه راح للبخاري اللي عند بيتهم وشرا له حبه مع الرز وتغدا وبدا يفكر في اللي سواه .
وفي هذه الأثناء بالذات تذكر طلعت المشاكل اللي بينه وبين ولد الجيران حمدي يعني إذا جمعتهم اثنينهم صارو طلعت حمدي (( اسم مدرس نحو وهذي آخر سنه له بالسعوديه )) وقال في نفسه (( ليه مااحط حرتي في حمدي واسوي له مشكله ما يحلم فيها ؟؟))
و ............................

تدرون احتروا الجزء الثاني .


@@@@@@@@@@@@@@@@@@@@@@@@@@@@@


الجزء الثاني


فتى الشميسي

بعد مافكر طلعت قال مالي الا اذب التجوري عند ولد الجيران حمدي عشان انكبه مثل مانكبني
وكان سبب حقده على حمدي ان طلعت قال بينه وبين جاره اللي فوقه المصري ابو ايمن مشاكل ومن حقد طلعت على ابوايمن كب في مكينة سيارته سكر وملح وكان حينها حمدي جالس يقزه من السطح وعلم ابو ايمن عليه فراح ابوايمن لطلعت وطق الباب لما فتح له طلعت صكه ابو ايمن كف عدل به وجهه وقال لطلعت انا حسيبك المره دي عشان العيش والملح اللي بيني وبين المرحوم ولدك بس المره التنيه مش حخلي نهارك يعدي على خير غور من وشي ودز لشقته ابومصير .
وفي ليلتن ظلمى ماشيف فيها البدر امتطى طلعت صهوة هايلكسه وذب التجوري عند بيت حمدي الي يحب انه يجمع قرابيع .
بعد ما ذبه وركب موتره جلس طلعت يفكر يقول لوني اقل شي لاقي عشرين الف ريال كان رحت لساحل العاج وجبت كم راس فيل بسعر الجمله وابيعهم على حديقة الحيوان نمشي امورنا في ذا الصيف بدل ذا القعده.
طلع حمدي يصلي الفجر وشاف التجوري وقال الوعد بعد الصلاة وبعد مارجع من المسجد شال التجوري ودخله البيت وجلس يتعبث فيه ويقلبه وحينها انفتح باب سري وطاح من التجوري ثلاثين الف اصيب حمدي بالهلع وضاق عنده التنفس وقل الاكسجين عنده وزادت نبضات قلبه وتعدت الخط الاحمر وراح يشرب مويه من هول ما شاف وراح وقال لبوه الهرجه فقاله ابوه وز ( وز والا بط ) التجوري كم يوم يمكن يجي راعيه يسال عنه . قام حمدي ووزا الدراهم تحت البلاط .
طبعا اهل التجوري مسافرين الشرقيه دق جوال ولدهم سعيد وسعيد كان اصغر من محمد بسنتين
رد سعيد ولقاهم العمل يقولون نبيك تحجز على اول طيارة
لاننا نبي منك ملفات مهمة0
وحجز سعيد ورجع للرياض ووصل للبيت ودخل للمطبخ وصب له كاس من الماء وصعد لكي يرتاح شوي وبعد ما كان
متجه لغرفته لاحظ ان باب غرفة امه مفتوح على مصراعيه وحط شنطة السفر وراح للغرفة وبعد ما دخل
لاحظ ان اللوحة على جنب والتجوري غيرموجود في الغرفة مؤقتا
ومن هول الصدمة سقط الكاس من يد سعيد على الارض ولكنه ما انكسر لأن الكاس كان بلاستيك
المهم جت الشرطة ما لقت بصمات وقالوا لما تحصله دق علينا قال سعيد الحين انا اللي ادق عليكم قالوا ايه وش ظنك ردعليهم سعيد وقال اطلعوا بس خلوني اشوف شغلي

بعد يومين كان عند سعيد مراجعة في مستشفى الشميسي ودخل على الدكتور وبعد انتهاء الجلسة قال الدكتور باعطيك موعد ثاني المهم طلع سعيد من عند الكتور وراح للموضف لاستلام الموعد الثاني وقاله الموضف موعدك بعد
ثلاث سنوات يعني عام 2006بعد ما تشوف المبارة الافتتاحية في كاس العالم انشاءالله تعال على طول
قال سعيد ما تبيني اجيك على عرض
قال سعيد للموضف على طاري كاس العالم ما ظنك يشفرونها قال الموضف من اليوم الى 2006الله اعلم وش بيصير يمكن يلغون كاس العالم ويمكن يخبط قمر صالح كامل كل شي وارد
قال سعيد ما ندري وش نسوي مع ذا التشفير
قال الموضف اسمع كانك تعرف شباب يطلعون كل خميس للفضاء عطهم حق الخط وقل لهم يكسرون قمر صالح بن كامل ويفصلون اسلاكه
قال سعيد الحين فيه اسلاك ؟
قال الموضف ايه وش ظنك سلك ممدود من القمر على بيت
صالح بن كامل دايركت ما لاحظت في كاس العالم 2002
بعض الأوقات تنقطع الصورة وبعدين تعوّد
قال سعيد الا لاحظت الشي هذا
قال الموضف سبب الأنقطاع عيال بن كامل الصغار يلعبون ويتلاحقون واثناء التلاحق يوطون السلك وينفصل وتنقطع الصورة بعدين يجي ابوهم ويشبك السلك وترجع الصورة
قال سعيد وانا احسب الخلل من المصدر
قال الموضف يسكتونكم بالمصدر وانتم تصدقون
قال سعيد طيب لو خربناه يمكن يصلحه
قال الموضف ما ظنيت قطع غياره غالي ومدير الشركة متلاقط هو وابو كامل يعني الوضع من صالحنا
قال سعيد اتشكرك على المعلومات القيّمة وفرصة سعيدة
وطلع سعيد وركب سيارته وقال بوقف عند بقالة اشتري شي اشربه ووقف ودخل البقالة وشراله مويه وعصير وعطى صاحب البقاله الشايب ريالان فقط لا غير
قال الشايب بعد ما قلّّّّب الفلوس دراهمك يا وليدي ما تمشي
قال سعيد ليه ؟ (شك سعيد وقال في نفسه يمكنها مزورة وصار يفكر في وضعه لو دخل السجن من اللي بيغسل ملابسه وبدا يفكر انه يسافر لأوربا مثل اللاجئين السياسيّن))
صحى من هواجيسه لأن الشايب كان بناديه ويقول له دراهمك ما تمشي عشانهه ما لها رجلين بداء الشايب يضحك وفرح سعيد انها مزحه وطلع وهو فرحان وفي الوقت اللي كان متجه لسيارته لمح ساعه سوداء على طبلون هايلوكس قال سعيد كأنها ساعتي اللي شريت من الأمارات وقرب راسه عند الساعة ولاحظ ان توقيت الساعة
يفرق ساعة واحدة عن توقيت ساعته اللي يلبسهه وانّ توقيت الساعة هو نفس توقيت الأمارات الآن وزادت نسبة التأكد عند سعيد لكن سعيد قال باخذ الساعة وافحص البصمات وشال الساعة بطاقيته عشان البصمات 000
وبعد الفحص وجد انّ في الساعة عدة بصمات مختلفة ومن ضمنها بصمات سعيد 00000000
تأكد سعيد بعد ذلك انها ساعته التي سلبت مع التجوري 00
وراح للشرطة وقال لهم القصة طلع واحد من رجال الشرطة مع سعيد عشان يوريه البيت المهم وصلوا للموقع
وفي نفس الوقت هذا كان طلعت بالمطبخ يدور سكر لأنه في اغلب الأحيان يحب انه يشرب قهوته في الصباح الباكر وما حصّل ألا سكر قليل وقهوته كانت سكر زيادة
وطلع طلعت يشتري سكر وأول ما فتح الباب لاحظ أنّ فيه لومينا حقت حكومة عند باب العمارة صك طلعت الباب بسرعة وراح يركض للمجلس وطفّى اللمبات وفتح الدريشة شوي ولاحظ أن فيه رجال مع الشرطي يكلمه ويشّر على الهايلوكس حقه تأكد طلعت أنه هو المعني في هذا الموقف
فكّر طلعت في الهروب وقال مالي (مالي والا السنغال)
قال مالي الا أرقى للسطح وأطب على الشارع الثاني وأنحاش وبسرعة راح للسطح وطل يشوف كيف بيحوّل
لاحظ أن الطريقة الممكنة للنزول على الشارع الثاني أنه يطب على المكيف الصحراوي حق جاره المصري أبوايمن وبعد ذلك ينزل مع الماصورة وفعلا طب طلعت على المكيف طبه قويه ومن قوة الطبه قام أبو ايمن من النوم مفزوع وفتح الدريشة وشاف طلعت فوق مكيفه وقال سواني يا سي طلعت وأكون عندك وأكسّرلك نفوخك واعلمك الاصول وسرعة نزل طلعت مع الماصورة على الشارع ومن الخوف شاف له وايت مكتوب عليه مياه صالحة للشرب رقى فوق الوايت ودخل داخل المويه اللي كان
راعي الوايت بيوديها لمكان محتاجين مويه واختفى طلعت عن الانظار
وفي الوقت هذا كان أبوايمن تحت سريره يبحث عن العجره وبعد ما لقاها خذها واتجه لباب الشقة عشان يطلع يدور طلعت وشافته أم ايمن ومسكته وقالت له سيبو يا أبو ايمن ما تحوطش نفوخك بنفوخه دا لسّه عيّل صوغير
قال أبو ايمن انا لازم أكسّر نفوخه واعلمو الاصول كمان سبيني ياأم ايمن بأولك سبيني 00
وطلع أبوايمن وصك الباب وهو شايل العجرة وكان لابس صروال قصير وفنيلة علاّق وهونازل شاف شرطي يطرق باب طلعت ومعه رجّال قالهم عاوزين طلعت قال الشرطي نبي صاحب الشقة قال أبوايمن دا لسّه هربان مع الشارع التاني الحئوا عليه ابل ما يهرب وراحوا كلهم بسرعة يدورونه لكن ما حصلوه لأن الوايت مشى وطلعت كان وسط المويه
المهم قال الشرطي لأبوايمن نبيك تجي معنا للقسم عشان تعطينا معلومات عن طلعت قال المصري البس واجيكم وراح للقسم وخذوا معلومات اول ما تشوفه تخبرنا
قال المصري وهو كزلك وطلع المصري من عند الضابط
وطلعت في هذا الوقت في الوايت حس طلعت بتوقف الوايت قال طلعت يمكن الوايت وقف في شارع عام خلني اطلع من الوايت واروح لأحد اصدقائي وازبن عنده وطلع طلعت من الوايت وبدا يعرك عيونه في هذا الوقت سمع واحد يقول حرامي وكان هذا الشخص أبوايمن وكان الوايت جاي يعبّي مويه للقسم اصلاً وتحرك بعض افراد الشرطة ومسكوا طلعت وقيدوه ودخلوه داخل القسم 000
دخل طلعت على الضابط وبعد التحقيق اعترف لكنه قال انا ما حصلت الا 700 واهل التجوري يقولون فيه ثلاثين الف وسبع مائه فكّر سعيد وقال في نفسه يمكنه ما عرف يفتح الباب السري وسأل سعيد طلعت وقال له وين التجوري
قال ذبيته عند بيت ابو حمدي
قال أبوايمن لسعيد انا بأعرف ابو حمدي وراحوا للبيت وقابلوا أبو حمدي وقالوا له القصة ونادى ولده وقال جب الفلوس وخذا سعيد الفلوس وشكر الشايب وولده وأبوايمن معهم ودق على القسم وقال للضابط اني حصلت الفلوس 00
قال الضابط لطلعت الحين عليك ثلاث قضايا
الاولى: سرقة التجوري
الثانية:الهروب
الثالثة:سرقة بعض موية وايتنا
قال القضية الثالثة ما فهمتها ؟
قال الضابط الحين البلل اللي في ملابسك من وين؟
قال طلعت من الموية عند ما كنت في الوايت
قال الضابط اعترفت بنفسك أن المويه اللي في ملابسك من وايتنا وهذي تعتبر سرقة
قال طلعت اسمح لي اقول لك اني كنت معجب بأسلوبك
قال الضابط الله يسلمك
قال طلعت لكن الآن اسمح لي اقولك كلّ تراب تجيب لي قضيه ثالثه على كيفك
قام الضابط من كرسيّه وصك طلعت بكف من قوته العسكري اللي كان ماسك طلعت قدّم استقالته ودخل طلعت السجن ينتظر المحاكمه0